முட்டுக்காடு கலைஞர் பன்னாட்டு மாநாட்டு அரங்கம்… அமைச்சர் எ.வ.வேலு ஆய்வு!

முட்டுக்காடு பகுதியில் கலைஞர் பன்னாட்டு மாநாட்டு அரங்கம் அமைக்கும் பணிகளை அமைச்சர் எ.வ.வேலு இன்று ஆய்வு செய்தார்.

அமைச்சர் எ.வ.வேலு இன்று ஆய்வு
சென்னை கிழக்கு கடற்கரை சாலையில், முட்டுக்காடு பகுதியில் கலைஞர் பன்னாட்டு மாநாட்டு அரங்கம் அமைக்கும் பணிகளின் நிலையை பொதுப் பணி மற்றும் நெடுஞ்சாலைத் துறை அமைச்சர் எ.வ.வேலு  இன்று ஆய்வு செய்தார். மாநாட்டு அரங்கம் 2025 – ஆம் ஆண்டு இறுதியில் அல்லது 2026 – ஆம் ஆண்டு தொடக்கத்தில் முழுமையாக முடிக்கப்படும் என எதிர்பார்க்கப்படுகிறது.

முட்டுக்காட்டில் கலைஞர் பன்னாட்டு மாநாட்டு அரங்கம்
சென்னையில் புதிய உலகத் தரமான பன்னாட்டு அரங்கம், முத்தமிழறிஞர் கலைஞர் கருணாநிதியின் பெயரில் நிறுவப்படும் என 2023 பிப்ரவரி 2 – ஆம் தேதி முதலமைச்சர் மு.க.ஸ்டாலின் அறிவித்து இருந்தார்.
அதன்படி தமிழக அரசின் பொதுப் பணித் துறை சார்பில், செங்கல்பட்டு மாவட்டத்தில், திருப்போரூர் தாலுகா, முட்டுக்காட்டில் 525 கோடி ரூபாய் மதிப்பீட்டில் கலைஞர் பன்னாட்டு மாநாட்டு அரங்கம் மையம் திட்டத்தை தொடங்கியுள்ளது.

அரங்கத்தின் முக்கிய அம்சங்கள்
இந்த திட்டத்தின் கீழ், 37.99 ஏக்கர் நிலத்தில் 5,000 இருக்கைகளைக் கொண்ட மாநாட்டுக் கூடம், 10,000 பேர் அளவில் பார்வையாளர்களுக்கு வசதி அளிக்கும் கண்காட்சி அரங்கம், கூட்ட அரங்குகள் போன்றவை அமைய உள்ளன. இத்துடன், திறந்தவெளி அரங்கம், உணவு விடுதிகள், 10,000 வாகனங்களுக்கு வாகன நிறுத்த வசதி மற்றும் சுற்றுச்சூழல் வசதிகளும் உருவாக்கப்படுகின்றன.

கட்டுமான பணிகள்
கலைஞர் பன்னாட்டு மாநாட்டு அரங்கம் 2025-ஆம் ஆண்டு இறுதியில் அல்லது 2026 – ஆம் ஆண்டு தொடக்கத்தில் முழுமையாக முடிக்கப்பட்டு, உலகத் தரத்தில் அமைக்கப்பட இருக்கிறது. இந்த நிலையில் பொதுப் பணித் துறை அமைச்சர் எ.வ.வேலு, கூடுதல் தலைமைச் செயலாளர் மங்கத் ராம் சர்மா, அதிகாரிகள் உடன் பணிகளின் நிலையை ஆய்வு செய்தனர். இதில் கூடுதலாக மேற்கொள்ளப் பட வேண்டிய பணிகள் குறித்தும் ஆய்வு செய்யப்பட்டது.

கலைஞர் பன்னாட்டு மாநாட்டு அரங்கம், தமிழ்நாட்டின் அடையாளமாக உருவெடுப்பதாகவும், உலகளாவிய நிகழ்ச்சிகளை நடத்தத் தகுந்த சுற்றுலா மற்றும் வர்த்தக தளமாக மாறும் என கூறப்படுகின்றது.